Það þarf að huga að mörgu þegar bú eru undirbúin fyrir haust og vetur. Það sem ég hef heyrt á nokkrum býbændum, viðhafa þeir kolvitlausar aðferðir miðað við það sem gert er víða erlendis. Þess vegna langar mig til að benda á mjög fræðandi myndband sem ég sá á Youtube. Þar er Úkraínskur maður að nafni Andrew og býr á Írlandi. Hann er með Youtube svæði sem kallast Irish Bee. Hér er stuttlega endursagt það sem hann segir frá í myndbandinu.

Þegar hunangskassar eru teknir á haustin til vinnslu hefur safnast fyrir hunang og það hefur dregið úr varpi hjá drottningunni. Þar skapast nokkur hætta fyrir búið vegna þess að allar býflugur sem eru sýnilegar í ágúst-september munu drepast fyrir veturinn. Þetta eru sumarflugur en ekki vetrarflugur. Nú þarf að undirbúa að vetrarflugurnar klekist út.

Hér er tekið dæmi um bú sem situr á tveimur varpkössum. Allar býflugur eru hristar úr römmum í efri kassanum. Býflugurnar eru látnar fara í neðri kassann. Rammar úr efri kassanum sem eru með hunangi eru tæmdir í slengivél, nema þeir rammar sem innihalda egg, lirfur og púpur. Tómu rammarnir eru settir aftur í efri kassann.